கிணற்றில் மூழ்கி கல்லூரி மாணவர் பலி!

கிருஷ்ணகிரி

கிருஷ்ணகிரி அருகே கிணற்றில் குளித்த கல்லூரி மாணவர், நீரில் மூழ்கி பரிதாபமாக உயிரிழந்தார்.

தருமபுரி மாவட்டம் பாப்பிரெட்டிபட்டி அருகே உள்ள அஸ்தகிரியூரை சேர்ந்தவர் வஜ்ரவேல் (21). இவர் தருமபுரி அரசு கல்லூரியில் இளங்கலை இறுதியாண்டு படித்து வந்தார். இந்த நிலையில், வஜ்ரவேல் நேற்று கிருஷ்ணகிரி மாவட்டம் காவேரிபட்டினம் அடுத்த பள்ளப்பட்டியில் உள்ள உறவினரின் வீட்டிற்கு, திருவிழாவிற்காக சென்றிருந்தார்.

பின்னர், அந்த பகுதியில் உள்ள விவசாய கிணற்றுக்கு நண்பர்களுடன் சென்று குளித்து கொண்டிருந்தார். அப்போது, நீச்சல் தெரியாததால் வஜ்ரவேல் திடீரென நீரில் மூழ்கி மாயமாகினார். இதனை கண்டு அவரது நண்பர்கள் கூச்சலிடவே, அந்த பகுதி விவசாயிகள் கிணற்றில் குதித்து தேடினர்.

அப்போது, வஜ்ரவேல் உயிரிழந்த நிலையில் சடலமாக மீட்கப்பட்டார். தகவல் அறிந்த காவேரிப்பட்டினம் போலீசார் சடலத்தை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும், இதுகுறித்து வழக்குப்பதிவு செய்து விசாரித்து வருகின்றனர்.