78வது சுதந்திர தினம்: கோட்டை கொத்தளத்தில் கொடியேற்றுகிறார் முதலமைச்சர் ஸ்டாலின்..  

இந்தியாவின் 78வது சுதந்திர தினத்தையொட்டி சென்னை ஜார்ஜ் கோட்டை கொத்தளத்தில்  நடக்கும் விழாவில் முதலமைச்சர் மு.க.ஸ்டாலின் தேசியக் கொடியேற்றி உரையாற்றுகிறார்.

இந்தியாவின் 78-வது சுதந்திர தின விழா இன்று நாடு முழுவதும்  கோலாகலமாக கொண்டாடப்படுகிறது. தமிழக அரசின் சார்பில் சென்னை செயின்ட் ஜார்ஜ் கோட்டையில் சுதந்திர தின விழா நிகழ்ச்சிகளை நடத்த பிரமாண்டமாக ஏற்பாடுகள் செய்யப்பட்டுள்ளன. மேலும், சென்னை தலைமைச் செயலகம் உள்ளிட்டவை வண்ண விளக்குகளால் அலங்கரிக்கப்பட்டு உள்ளன. அத்துடன் செயின்ட் ஜார்ஜ் கோட்டையில் உள்ள கொடி மரம் அலங்கரிக்கப்பட்டு அதன் அருகே மேடை அமைக்கப்பட்டுள்ளது.  முன்னதாக கோட்டை கொத்தளத்திற்கு வரும் முதலமைச்சர் மு.க.ஸ்டாலினை, தலைமை செயலாளர் சிவதாஸ் மீனா வரவேற்பார்.  தொடர்ந்து முப்படை அதிகாரிகள், காவல்துறை உயர் அதிகாரிகள் அறிமுக நிகழ்வு மரபுப்படி நடைபெறும்.  

தொடர்ந்து அணிவகுப்பு மரியாதையை ஏற்றபடி விழா மேடைக்குச் செல்லும் முதலமைச்சர் மு.க.ஸ்டாலின், காலை 9 மணிக்கு புதுப்பிக்கப்பட்ட கொடிக்கம்பத்தில் வைக்கப்பட்டிருக்கும் மூவர்ணக் கொடியை ஏற்றி மரியாதை செலுத்துவார். இதனைத் தொடர்ந்து  சுதந்திர தின உரையை  நிகழ்த்தும் அவர்,  அப்போது சுதந்திர போராட்ட தியாகிகள் மற்றும் அவர்களின் வாரிசுகளுக்கான மாதாந்திர ஓய்வூதியத்தை உயர்த்தி அறிவிப்பார். மேலும், தகைசால் தமிழர் விருது, ஏபி.ஜே. அப்துல்கலாம் விருந்து உள்ளிட்ட மாநில அரசு விருதுகளை வழங்கவுள்ளார்.