நடிகர் டெல்லி கணேஷ் உடல் தகனம்... தேசிய கொடி போர்த்தி இறுதி மரியாதை!

மறைந்த நடிகர் டெல்லி கணேஷின் உடல் நெசப்பாக்கம் மின் மயானத்தில் தகனம் செய்யப்பட்டது.

நடிகர் டெல்லி கணேஷ் உடல்நலக்குறைவு காரணமாக காலமானார். அவருக்கு வயது 81.  குணச்சித்திர நடிகர் டெல்லி கணேஷ் ஆகஸ்டு 1,1944 நெல்லையில் பிறந்தார். 1976ல் இயக்குநர் கே.பாலச்சந்தரின் ‘பட்டின பிரவேசம்' படத்தில் அறிமுகமானார். நடிகர் கமலின் 'அபூர்வ சகோதரர்கள்' படத்தில் வில்லனாக மிரட்டியுள்ளார். சிந்து பைரவி, நாயகன், மைக்கேல் மதன காம ராஜன், தெனாலி, அவ்வை சண்முகி உள்ளிட்ட படங்களில் தனது யதார்தமான நடிப்பால் மனதில் நின்றார். 1994ல் கலைமாமணி விருது வென்றார். குறும்படங்கள், டிவி நெடுந்தொடர்கள், வெப் சீரிஸ்களிலும் நடித்துள்ளார். சமீபத்தில் திரைக்கு வந்த ரத்னம், அரண்மனை 4, இந்தியன் 2 ஆகிய படங்களிலும் நடித்திருந்தார். இந்த் நிலையில், நடிகர் டெல்லி கணேஷ் (81) உடல்நலக்குறைவு காரணமாக காலமானார். கடந்த 3 நாட்களாகவே உடல்நிலை சரியில்லாமல் இருந்த நிலையில், நேற்று இரவு 11.30 மணியளவில் சென்னை ராமாபுரத்தில் உள்ள அவரது வீட்டில் உயிர் பிரிந்தது.

இந்த நிலையில், மறைந்த நடிகர் டெல்லி கணேஷின் உடல் நெசப்பாக்கம் மின் மயானத்தில் தகனம் செய்யப்பட்டது. உயிரிழந்த நடிகர் டெல்லி கணேஷின் உடல் சென்னை ராமாபுரத்தில் இல்லத்தில் பொதுமக்கள் அஞ்சலிக்காக வைக்கப்பட்டது. இதனை தொடர்ந்து டெல்லி கணேஷ் உடலுக்கு விமானப்படை அதிகாரிகள் தேசிய கொடி போர்த்தி இறுதி மரியாதை செலுத்தினர். இதனையடுத்து ராமாபுரத்தில் உள்ள இல்லத்தில் இருந்து நெசப்பாக்கம் மின் மயானத்துக்கு கொண்டு செல்லப்பட்டு தகனம் செய்யப்பட்டது.