குட்கா வழக்கு - அதிமுக முன்னாள் அமைச்சர்கள் ஆஜராக உத்தரவு

குட்கா முறைகேடு வழக்கில் குற்றபத்திரிகை நகல் பெற முன்னாள் அமைச்சர்கள் சி.விஜயபாஸ்கர் , பி.வி.ரமணா, முன்னாள் டி.ஜி.பி, டி.கே.ராஜேந்திரன், சென்னை காவல்துறை முன்னாள் ஆணையர் ஜார்ஜ் உள்ளிட்டோர்  அக்டோபர் 14 தேதி  நேரில் ஆஜராக சென்னை சிறப்பு நீதிமன்றம் உத்தரவிட்டுள்ளது.

தமிழகத்தில் தடையை மீறி அதிகாரிகளுக்கு லஞ்சம் அளித்து குட்கா பொருள்கள் விற்கபட்ட புகாரில் டெல்லி சிபிஐ வழக்கை விசாரித்து வருகிறது. இதில் மாதவராவ், சீனிவாசராவ், உமாசங்கர் குப்தா, உணவு பாதுகாப்புத்துறை அதிகாரி செந்தில்முருகன், மத்திய கலால்துறை அதிகாரி நவநீத கிருஷ்ண பாண்டியன், சுகாதாரத்துறை அதிகாரி சிவக்குமார் ஆகிய 6 பேர் மீது வழக்கு பதிவு  செய்த சிபிஐ,  இவர்களுக்கு எதிரான சென்னை சிபிஐ நீதிமன்றத்தில் குற்றப்பத்திரிகை தாக்கல் செய்தது.

இந்நிலையில் ஏற்கனவே உள்ள ஆறு பேருடன் கூடுதலாக மத்திய, மாநில அரசு அதிகாரிகள்,  முன்னாள் அமைச்சர்கள் உள்ளிட்டோர் பெயர்களை இணைத்து சிபிஐ கூடுதல் குற்றபத்திரிகை தாக்கல் செய்தது. அதல் அதிமுக முன்னாள் அமைச்சர்கள் பி.வி.ரமணா ,டாக்டர் சி.விஜயபாஸ்கர்  சென்னை காவல்துறையின் முன்னாள் ஆணையர் எஸ்.ஜார்ஜ், தமிழக முன்னாள் டிஜிபி டி.கே.ராஜேந்திரன், வணிக வரித்துறை இணை ஆணையராக பதவி வகித்த வி.எஸ்.குறிஞ்சிச்செல்வன், வணிக வரித்துறை கூடுதல் தலைமைச் செயலாளராக பதவி வகித்த எஸ்,கணேசன், சுகாதாரத்துறை அதிகாரிகளான டாக்டர். லக்ஷ்மி நாராயணன்  உள்ளிட்ட 21 பேர் மீது கூடுதல் குற்றபத்திரிகையில் குற்றம் சாட்டபட்டுள்ளது.

இந்நிலையில் இந்த வழக்கு  எம்.பி, எம்.எல்.ஏ மீதான குற்ற வழக்குகளை விசாரிக்கும் சிறப்பு நீதிமன்ற நீதிபதி சி. சஞ்சய் பாபா முன்பு கடந்த 9 தேதி விசாரணைக்கு வந்த போது சி.விஜயபாஸ்கர், பி.வி. ரமணா, ஓய்வு பெற்ற டி.ஜி.பிக்கள் டி.கே.ராஜேந்திரன், ஜார்ஜ் உள்ளிட்ட 25பேர்  நேரில் ஆஜராகி இருந்தனர். அப்போது குற்றபத்திரிகை நகல் தயராகவில்லை என சிபிஐ தரப்பில் தெரிவிக்கப்பட்டதை அடுத்து விசாரணை தள்ளிவைக்கபட்டது.

இந்நிலையில்  வழக்கு இன்று மீண்டும் சிறப்பு நீதிமன்ற நீதிபதி சி.சஞ்சய் பாபா முன்பு விசாரணைக்கு வந்தது. அப்போது சிபிஐ தரப்பில் ஆஜரான வழக்கறிஞர் கூடுதல் குற்றபத்திரிகை நகல்களை தாக்கல் செய்தார். சுமார் 250 பக்கங்கள் கொண்ட கூடுதல் குற்றபத்திரிகை உடன் ஆவணங்கள் என சுமார் 20 ஆயிரம் பக்கங்களை தாக்கல் செய்தார். ஆவணங்கள் பென் டிரைவில் தாக்கல் செய்தார்.  இதற்கு ஆவணங்கள் அனைத்தும் காகிதத்தில் வழங்க வேண்டும் என குற்றஞ்சாட்டப்பட்டவர்கள் தரப்பில் ஆஜரான வழக்கறிஞர் தெரிவித்தனர். இதனையடுத்து விசாரணை அக்டோபர் 14 தேதி தள்ளிவைத்த நீதிபதி அன்று கூடுதல் குற்றபத்திரிகை பெற குற்றஞ்சாட்டப்பட்ட அனைவரும் ஆஜராக வேண்டும் தெரிவித்துள்ளார்.