மருத்துவமனையில் வைகோ - வெளியான வீடியோ - தொண்டர்கள் நிம்மதி!!
தமிழ்நாட்டிற்கு மேலும் சேவை செய்ய காத்திருக்கிறேன். பரிபூரண ஆரோக்கியத்தோடு மீண்டு வருவேன் என்று வைகோ தெரிவித்துள்ளார்.
சென்னை தனியார் மருத்துவமனையில் இன்று தனக்கு அறுவை சிகிச்சை நடக்கவிருக்கும் நிலையில் மதிமுக பொதுச்செயலாளர் வைகோ பேசிய வீடியோ வைரலாகியுள்ளது.
இதுதொடர்பாக வெளியிட்டுள்ள வீடியோவில், தமிழகத்தில் பொது ஊழியம் செய்கின்ற சாதாரண தொண்டனாகிய இந்த வைகோ, ஏறத்தாழ 7 ஆயிரம் கிலோ மீட்டர் நடந்திருக்கிறேன். கீழே விழுந்ததில்லை. ஆனால், நான்கு நாட்களுக்கு முன்பு திருநெல்வேலி சென்றபோது, தங்கி இருந்த வீட்டில் படிகளின் வழியாக ஏறாமல் பக்கத்தில் இருந்த திண்ணையில் ஏறினேன். அப்போது நிலை தடுமாறி விழுந்து விட்டேன்.
நான் நன்றாக இருக்கிறேன். முழு ஆரோக்கியத்தோடு உள்ளேன். நான் முன்பு போன்று இயங்க முடியுமா? என்று யாரும் சந்தேகம் பட வேண்டாம். நான் உழைப்பு என்பதற்கு இலக்கணமாக இருக்கக்கூடியவன் என்பதை கலைஞர் சொல்லியிருக்கிறார்.
பொது வாழ்வில் அக்கறை உடையவர்கள் எல்லோருக்கும் நான் சொல்லிக் கொள்வது, தமிழ்நாட்டில் செய்ய வேண்டிய சேவைகளை செய்வதற்கு நான் காத்துக் கொண்டிருக்கிறேன். வைகோ முழு நலத்தோடு, முழு ஆரோக்கியத்தோடு வருவேன் என்பதை எனக்காக கவலைப்படும் உள்ளங்களுக்கு தெரிவித்து என் நன்றியை தெரிவித்துக் கொள்கிறேன் என்று குறிப்பிட்டுள்ளார்.