தவெக மாநாட்டில் பாதுக்காப்பு பணியில் ஈடுபட்ட காவலர் விபத்தில் சிக்கி உயிரிழப்பு..!!

 தவெக மாநாட்டிற்கு பாதுகாப்பு பணிக்குச் சென்றுவிட்டு திரும்பிய காவலர் விபத்தில் சிக்கி உயிரிழந்த சம்பவம் சோகத்தை ஏற்படுத்தியுள்ளது.  

விழுப்புரம் மாவட்டம் விக்கிரவாண்டியை அடுத்த வி.சாலையில் நடிகர் விஜய்யின் அரசியல் கட்சியான தவெகவின் முதல் மாநாடு கடந்த 27ம் தேதி நடைபெற்றது. இதில் சுமார் 5 லட்சம் பேர் பங்கேற்றதாக கூறப்படுகிறது.  இந்த மாநாட்டில் சுமார் 6,000 போலீஸார் பாதுகாப்பு பணியில் ஈடுபட்டிருந்தனர்.  அதில் விழுப்புரம் மாவட்டம் மேல்பாதியைச் சேர்ந்த இரண்டாம் நிலை காவலர் சத்தியமூர்த்தி,  தமிழக வெற்றிக்கழக மாநாட்டு பாதுகாப்பு பணிக்காக இருசக்கர வாகனத்தில் சென்றுள்ளார்.  மதுராந்தகம் காவல் நிலையத்தில் பணிபுரிந்து வந்த சத்தியமூர்த்தி  மாநாடு முடியும்வரை பாதுகாப்பு பணியில் ஈடுபட்டிருக்கிறார்.  

பின்னர் பணி முடிந்து இருசக்கர வாகனத்தில் புறப்பட்டுள்ளார். விழுப்புரம் அய்யூர் அகரம் ரயில்வே மேம்பாலத்தில் சென்று கொண்டிருந்த போது,  சாலை தடுப்பில் மோதி விபத்தில் சிக்கினார். அவர் தலைக்கவசம் அணியாமல் பயணித்ததாக கூறப்படும் நிலையில்,  தலையில் பலத்த காயம் ஏற்பட்டதாக தெரிகிறது.  இதனையடுத்து உடனடியாக  அவர் விழுப்புரம் முண்டியம்பாக்கம் அரசு மருத்துவமனையில்  சிகிச்சைக்காக அனுமதிக்கப்பட்டார்.  பின்னர்  மேல் சிகிச்சைக்காக சென்னை ராஜீவ் காந்தி அரசு மருத்துவமனைக்கு அனுப்பிவைக்கப்பட்ட அவருக்கு  தீவிர சிகிச்சை அளிக்கப்பட்ட நிலையில் இன்று சிகிச்சை பலனின்றி உயிரிழந்தார்.