கீழே விழுந்து உயிரிழந்த சிவராமனின் தந்தை.. சிசிடிவி காட்சிகள் வெளியீடு.. 

 கிருஷ்ணகிரி அருகே பள்ளி மாணவிகள் பாலியல் வன்கொடுமை நிகழ்வில் கைதாகி, எலி மருந்து சாப்பிட்டு உயிரிழந்த சிவராமனின் தந்தை அசோக் குமார், நேற்றிரவு இரு சக்கர வாகனத்தில் இருந்து கீழே விழுந்த சிசிடிவி காட்சிகள் வெளியாகியுள்ளன.  

கிருஷ்ணகிரி மாவட்டம் பர்கூரில் உள்ள தனியார் பள்ளி ஒன்றில்  போலியாக  என்.சி.சி முகாம் நடத்தி 14 வயது சிறுமியை பாலியல் வன்கொடுமை செய்த வழக்கில்  நாதக முன்னாள் நிர்வாகி சிவராமன் போக்சோ சட்டத்தின் கீழ் கைது செய்யப்பட்டார்.  தலைமறைவான சிவராமனை 19ம் தேதி  போலீஸார் கோவையில் வைத்து கைது செய்தனர். முன்னதாக  போலீசார் தேடுவதை அறிந்த சிவராமன் கைதாவதற்கு முன்பே(18ம் தேதி) எலி மருந்தை உட்கொண்டு தற்கொலைக்கு முயன்றிருக்கிறார். இதனைத்தொடர்ந்து போலீசாரிடம் இருந்து தப்ப முயன்ற போது கால் உடைந்ததை அடுத்து, கிருஷ்ணகிரி அரசு மருத்துவமனையில் சிகிச்சை அளிக்கப்பட்டு வந்தது. மருத்துவ சோதனையில் எலி பேஸ்ட் சாப்பிட்டது தெரியவந்தது.  

இதனையடுத்து அவருக்கு சிகிச்சை அளிக்கப்பட்ட நிலையில், சிவராமனுக்கு  மூச்சு திணறல் அதிக அளவில் இருந்ததன் காரணமாக மேல் சிகிச்சைக்காக சேலம் அரசு மருத்துவமனைக்கு நேற்று முன்தினம் இரவு அவர் கொண்டுவரப்பட்டார்.   நேற்று முழுவதும் அவர் தீவிர சிகிச்சை பிரிவில் இருந்து சிகிச்சை அளிக்கப்பட்டு வந்தது.  இந்நிலையில் இன்று அதிகாலை 5:30 மணி அளவில் சிவராமன் சிகிச்சை பலனின்றி உயிரிழந்தார்.  இதனிடையே சிறுமியை பாலியல் வன்கொடுமை வழக்கில், தனது மகன் கைது செய்யப்பட்டதை அறிந்த மன உளைச்சலில் இருந்த  சிவராமனின் தந்தை  அசோக் குமார், நேற்று இரவு 11.30 மணியளவில் உயிரிழந்தார்.   நேற்று காவேரிப்பட்டணம் அருகே பைக்கில் சென்று கொண்டிருந்த போது நிலைதடுமாறி கீழே விழுந்ததில் தலையில் அடிபட்டு உயிரிழந்தார்.  அப்போது அசோக் மதுபோதையில் இருந்ததாகவும் கூறப்படுகிறது.  

தந்தை, மகன் இருவரது இறப்பிலும் சந்தேகம் இருப்பதாகவும், யாரையோ காப்பாற்றும் நோக்கில் இந்த சம்பவம் நடைபெற்றிருக்கலாம் என்றும், உண்மை வெளிவந்துவிடக் கூடாது என்றும், வேறு யாரேனும் முக்கியப் புள்ளிகளின் பெயர்களை வெளியில் கூறிவிடுவாரோ என்ற அச்சத்தில், சிவராமன் கொல்லப்பட்டிருக்கலாமோ என சந்தேகம் எழுவதாக பாஜக மாநிலத் தலைவர் அண்ணாமலை உள்ளிட்ட பலர் கருத்துக்களை தெரிவித்து வந்தனர். இந்த நிலையில்  சிவராமனின் தந்தை அசோக் குமார், நேற்றிரவு இரு சக்கர வாகனத்தில் இருந்து கீழே விழுந்த சிசிடிவி காட்சிகள் வெளியாகியுள்ளன.