ஜல்லிக்கட்டு தீர்ப்பு முதலமைச்சரின் சட்டபோராட்டத்திற்கு கிடைத்த வெற்றி - அமைச்சர் ரகுபதி
ஜல்லிக்கட்டு தொடர்பான உச்சநீதிமன்றத்தின் தீர்ப்பு தமிழக முதலமைச்சர் மு.க.ஸ்டாலினின் சட்டப்போராட்டத்திற்கு கிடைத்த வெற்றி என சட்டத்துறை அமைச்சர் ரகுபதி கூறியுள்ளார்.
கடந்த 2014 ஆம் ஆண்டு ஜல்லிக்கட்டு போட்டிக்கு உச்ச நீதிமன்றம் தடை விதித்தது. இதைத் தொடர்ந்து தமிழகத்தில் மிகப்பெரிய அளவில் ஜல்லிக்கட்டு போராட்டம் நடத்தப்பட்டது. இதையடுத்து 2017 ஆம் ஆண்டு மிருகவதை தடுப்புச் சட்டத்தில் தமிழ்நாடு அரசு திருத்தம் செய்து குடியரசுத் தலைவரின் ஒப்புதல் பெற்ற பிறகு ஜல்லிக்கட்டு போட்டி நடத்த அனுமதி வழங்கப்பட்டது. இந்த சட்டத்தை எதிர்த்து பீட்டா அமைப்பு உச்ச நீதிமன்றத்தில் வழக்கு தொடர்ந்தது. இந்த வழக்கை நீதிபதி கே .எம் .ஜோசப் தலைமையிலாயின ஐந்து பேர் கொண்ட நீதிபதிகள் அமர்வு விசாரித்து வந்தது. இவ்வழக்கு விசாரணையில் ஜல்லிக்கட்டு காளைகள் துன்புறுத்தப்படுவதில்லை எனவும் அனைத்து விதிமுறைகளும், சரியாக நடைமுறைப்படுத்தப்படுவதாகவும் தமிழக அரசு தரப்பில் வாதிட்ட நிலையில், கடந்த ஆண்டு டிசம்பர் 8ம் தேதி வழக்கின் தீர்ப்பை தேதி குறிப்பிடாமல் உச்சநீதிமன்றம் ஒத்தி வைத்தது. இந்த சூழலில் இன்று தீர்ப்பு வழங்கப்பட்டது. ஜலிக்கட்டு போட்டியை அனுமதிக்கும் தமிழ்நாடு அரசின் சிறப்பு சட்டங்கள் செல்லும் என்று உச்சநீதிமன்றம் தீர்ப்பளித்துள்ளது. ஜல்லிக்கட்டு தொடர்பான தமிழ்நாடு அரசின் சட்டம் திருப்தி அளிக்கிறது என்றும் ஜல்லிக்கட்டு, தமிழ்நாட்டின் கலாச்சாரத்தோடு ஒருங்கிணைந்த பகுதி என தமிழ்நாடு அரசு கொண்டு வந்த சட்ட திருத்தத்தில் குறிப்பிடப்பட்டுள்ளது என்று 5 நீதிபதிகள் கொண்ட உச்சநீதிமன்ற அமர்வு அரசியல் சாசனம் தீர்ப்பளித்துள்ளது.
இந்த நிலையில், புதுடெல்லியில் செய்தியாளர்கள் சந்தித்த தமிழக சட்டத்துறை அமைச்சர் ரகுபதி கூறியதாவது: தமிழக அரசின் வாதத்தை உச்சநீதிமன்றம் ஏற்றுக்கொண்டுள்ளது. 5 நீதிபதிகளும் ஒருமித்த கருத்துடன் வரலாற்று சிறப்புமிக்க தீர்ப்பினை வழங்கியுள்ளனர். இந்த தீர்ப்பால் அனைத்து மக்களும் மகிழ்ச்சியடைந்துள்ளனர். இது முதல் அமைச்சர் மு.க.ஸ்டாலினின் சட்ட போராட்டத்திற்கு கிடைத்த மிகப்பெரும் வெற்றி. நீதிமன்றத்தின் வழிகாட்டுதலின்படி,போதிய பாதுகாப்பு முன்னெச்சரிக்கை நடவடிக்கைகளுடன் தமிழக அரசு போட்டிகளை நடத்தி வருகிறது. இவ்வாறு அவர் கூறினார்.