முதுமலை அடுத்த பந்திப்பூர் அருகே லாரி மோதி பெண் யானை உயிரிழப்பு!

நீலகிரி மாவட்டம் முதுமலை அடுத்த பந்திப்பூர் - முத்தங்கா சாலையில் நேற்றிரவு லாரி மோதி பெண் உயிரிழந்தது.                                                                                                                                                                                                                                                                                                                                                                                                                  நீலகிரி மாவட்டம் முதுமலை புலிகள் காப்பாகமும், அதனை ஒட்டி அமைந்துள்ள பந்திப்பூர் புலிகள் காப்பகமும் தமிழகம் - கர்நாடக மாநிலங்களை இணைக்கும் பகுதியாக விளங்குகிறது. இந்த வழியாக செல்லும் கூடலுர் - மைசூர் தேசிய நெடுஞ்சாலையில் கர்நாடக மாநிலத்தில் இருந்து தமிழகம், கேரளாவுக்கு நாள்தோறும் ஆயிரக்கணக்கான வாகனங்கள் சென்று வருகின்றன.                                                                                                                                                                                                                                                                                                                                                                                                                                                                                                                                                                                                                                              இந்த நிலையில், நேற்றிரவு  கேரளாவில் இருந்து கூடலுர் வழியாக மைசூர் நோக்கி சென்ற கோவை பதிவு எண் கொண்ட லாரி, பந்திப்பூர் - முத்தங்கா சாலையில் சென்றபோது, அந்த வழியாக சாலையை கடக்க முயன்ற 30 வயது மதிக்கத்தக்க பெண் யானை மீது அதிவேகமாக மோதி விபத்திற்கு உள்ளானது. இந்த விபத்தில் படுகாயமடைந்த பெண் யானை சம்பவ இடத்திலேயே பரிதாபமாக உயிரிழந்தது.                                                                                                                                                                                                                                                                                                                                                                                                                            தகவல் அறிந்து சம்பவ இடத்திற்கு வந்த பந்திப்பூர் வனத்துறையினர், லாரியை மடக்கிப்பிடித்து வழக்குப்பதிவு செய்தனர். தொடர்ந்து, உயிரிழந்த யானையின் உடலை கைப்பற்றி பிரேத பரிசோதனை செய்ய ஏற்பாடு செய்து வருகின்றனர். லாரி மோதி காட்டுயானை உயிரிழந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.