பீகார் ரயில் விபத்து எதிரொலி - 10க்கும் மேற்பட்ட ரயில்கள் ரத்து

பீகார் ரயில் விபத்து காரணமாக அந்த மார்க்கமாக செல்லும் 10க்கும் மேற்பட்ட ரயில்கள் ரத்து செய்யப்பட்டுள்ளன.

பீகார் மாநிலம் பக்சர் மாவட்டத்தில் உள்ள ரகுநாத்போர் ரயில் நிலையம் அருகே நேற்று இரவு வடகிழக்கு அதிவிரைவு ரயில் 21 பெட்டிகள் தடம் புரண்டன.  டெல்லி ஆனந்த விகாரில் இருந்து அசாம் காமாக்யா நோக்கி சென்ற ரயில் இரவு 9:35 மணி அளவில் ரகுநாத்போர் ரயில் நிலையம் அருகே தடம் புரண்டது. இதில் நான்கு பேர் சம்பவ இடத்திலேயே உயிரிழந்தனர். மேலும் 50க்கும் மேற்பட்டோர் காயம் அடைந்தனர். இதையடுத்து போலீசார் மீட்பு பணிகளில் ஈடுபட்டனர். விபத்து நடந்த இடத்தில் ரயில்வே அமைச்சர் பார்வையிடுவார் என்றும் எதிர்பார்க்கப்படுகிறது.  மீட்பு பணிகள் நிறைவடைந்துள்ளதாகவும் விபத்துக்கான காரணம் குறித்து உரிய விசாரணை நடத்தப்படும் என்றும், ரயில்வே அமைச்சர் தெரிவித்துள்ளார் .பீகார் ரயில் விபத்தில் உயிரிழந்த 4 பேர் குடும்பங்களுக்கு தலா 4 லட்சம் ரூபாய் நிவாரணம் வழங்கப்படும் என பீகார் முதலமைச்சர் நிதிஷ் குமார் அறிவித்துள்ளார்.

இந்த நிலையில், பீகார் ரயில் விபத்து காரணமாக அந்த மார்க்கமாக செல்லும் 10க்கும் மேற்பட்ட ரயில்கள் ரத்து செய்யப்பட்டுள்ளன. ரயில் விபத்து நிகழ்ந்த மார்க்கமாக செல்லும் பாட்னா-பூரி எக்ஸ்பிரஸ் உள்ளிட்ட 10க்கும் மேற்பட்ட ரயில்கள் ரத்து செய்யப்பட்டுள்ளன. மேலும், தில்பர்க் எக்ஸ்பிரஸ், பரவ்னி எக்ஸ்பிரஸ் உள்ளிட்ட 21 ரயில்கள் மாற்றுப் பாதையில் திருப்பி விடப்பட்டுள்ளதாக ரயில்வே அதிகாரிகள் தெரிவித்துள்ளனர்.