மக்களவை தேர்தலில் பாஜக கூட்டணியை 400 இடங்களில் வெற்றி பெற செய்ய வேண்டும் - பிரதமர் மோடி

வருகிற மக்களவைத் தேர்தலில் பாஜக தலைமையிலான தேசிய ஜனநாயக கூட்டணியை 400 இடங்களில் வெற்றி பெற செய்ய வேண்டும் என கட்சி நிர்வாகிகளுக்கு பிரதமர் மோடி அறிவுறுத்தியுள்ளார். 

பத்தாண்டு காலமாக மத்தியில் ஆட்சியில் உள்ள பாஜக தொடர்ந்து மூன்றாவது முறையாக ஆட்சியை பிடிக்க தீவிரம் காட்டி வருகிறது. தேர்தல் நெருங்கி வரும் நிலையில், கூட்டணி மற்றும் தொகுதி பங்கீடு தொடர்பான பேச்சுவார்த்தைகளை நடத்தி வருகிறது. இந்த நிலையில், நாடாளுமன்ற தேர்தலையொட்டி டெல்லியில் பாஜக செயற்குழு கூட்டம் நடைபெற்று வருகிறது. இரண்டாவது நாளாக இன்று நடைபெற்ற செயற்குழு கூட்டத்தில் பிரதமர் மோடி, மத்திய உள்துறை அமைச்சர் அமித் ஷா உள்ளிட்டோர் கலந்துகொண்டனர். 

இந்த நிலையில், பாஜக செயற்குழு கூட்டத்தில் பேசிய பிரதமர் மோடி, வருகிற மக்களவைத் தேர்தலில் பாஜக தலைமையிலான தேசிய ஜனநாயக கூட்டணியை 400 இடங்களில் வெற்றி பெற செய்ய வேண்டும். அடுத்த 5 ஆண்டுகளில் வளர்ச்சியடைந்த பாரதத்தை நோக்கிய மாபெரும் பயணத்தை மேற்கொள்ள உள்ளோம். நாட்டிற்காக வருடத்தின் அனைத்து நாட்களிலும், 24 மணி நேரமும் மக்களுக்காக பாஜக சேவை செய்கிறது. அடுத்த வரும் 100 நாட்கள் புதிய உற்சாகத்துடனும், புதிய நம்பிக்கையுடனும் பணியாற்ற வேண்டும் என கூறினார்.