ஆசிய கோப்பை தொடரின் இறுதி போட்டி இன்று நடைபெறவுள்ள நிலையில், இந்தியா மற்றும் இலங்கை அணிகள் பலப்பரீட்சை நடத்தவுள்ளன.
16வது ஆசிய கோப்பை கிரிக்கெட் தொடர் இலங்கையில் நடைபெற்று வருகிறது. முதல் நான்கு இடங்களை பிடித்த பாகிஸ்தான், இந்தியா, வங்கதேசம், இலங்கை ஆகிய அணிகள் சூப்பர் 4 சுற்றுக்கு முன்னேறின. சூப்பர் 4 சுற்றில் பாகிஸ்தான் மற்றும் இலங்கை அணியை பந்தாடிய இந்திய அணி இறுதிப் போட்டிக்கு முன்னேறியது. இதேபோல் சூப்பர் 4 சுற்றில் பாகிஸ்தான் மற்றும் வங்கதேச அணியை வீழ்த்தி இலங்கை அணி இறுதிப் போட்டிக்கு முன்னேறியது. இந்திய அணி ஆசிய கோப்பை தொடரில் வங்கதேச அணியிடம் மட்டுமே தோற்றுள்ளது. நேற்று முன் தினம் முநடைபெற்ற சூப்பர் 4 சுற்றில் இந்திய அணி வங்கதேச அணியிடம் 6 ரன்கள் வித்தியாசத்தில் போராடி தோற்றது.
இந்த நிலையில், இந்தியா மற்றும் இலங்கை அணிகளுக்கு இடையிலான இறுதிப் போட்டி இன்று நடைபெறவுள்ளது. இந்த போட்டி இன்று பிற்பகல் 3 மணிக்கு இலங்கை தலைநகர் கொழும்புவில் உள்ள பிரேமதாசா மைதானத்தில் நடைபெறவுள்ளது. கடைசி போட்டியில் பாகிஸ்தான் அணியை வீழ்த்தி த்ரில் வெற்றி பெற்ற இலங்கை அணி அதே உத்வேகத்தில் களமிறங்கவுள்ளது. இதேபோல் கடைசி போட்டியில் வங்கதேச அணியுடன் தோல்வி அடைந்த இந்திய அணி தவறை திருத்திக் கொண்டு இறுதிப் போட்டியில் வெற்றி பெற்று கோப்பையை கைப்பற்ற தீவிரம் காட்டி வருகிறது. இரு அணி வீரர்களும் தீவிர வலைபயிற்சியில் ஈடுபட்டுள்ளனர்.