2வது டி20 போட்டியிலும் இந்தியாவை வீழ்த்தியது மேற்கிந்திய தீவுகள் அணி!

இந்திய அணிக்கு எதிரான இரண்டாவது டி20 போட்டியில் மேற்கிந்திய தீவுகள் அணி 2 விக்கெட் வித்தியாசத்தில் வெற்றி பெற்றது.

இந்திய அணி மேற்கிந்திய தீவுகள் நாட்டில் சுற்றுப்பயணம் செய்து விளையாடி வருகிறது. முதலாவதாக டெஸ்ட் தொடர் நடைபெற்ற நிலையில், அதில் இந்திய அணி 1-க்கு 0 என்ற கணக்கில் தொடரை கைப்பற்றியது. டெஸ்ட் தொடரை அடுத்து 3 போட்டிகள் கொண்ட ஒருநாள் கிரிக்கெட் தொடர் நடைபெற்ற நிலையில், அதில் 2க்கு 01 என்ற கணக்கில் இந்திய அணி தொடரை கைப்பற்றியது. இதனை தொடர்ந்து தற்போது 5 போட்டிகள் ஒண்ட டி20 தொடர் நடைபெற்று வருகிறது. முதல் டி20 போட்டி கடந்த 03ம் தேதி நடைபெற்றது. இதில் மேற்கிந்திய தீவுகள் அணி 4 ரன்கள் வித்தியாசத்தில் இந்தியாவை வீழ்த்தி த்ரில் வெற்றி பெற்றது. 

 
இந்த நிலையில், இரண்டாவது டி20 போட்டி நேற்று இரவு நடைபெற்றது. இந்த போட்டியில் முதலில் பேட்டிங் செய்த இந்திய அணி 20 ஓவர்கள் முடிவில் 7 விக்கெட் இழப்புக்கு 152 ரன்கள் எடுத்தது. திலக் வர்மா அதிகபட்சமாக 51 ரன்கள் சேர்த்த நிலையில், மற்ற பேட்ஸ்மேன்கள் சொற்ப ரன்களில் ஆட்டமிழந்தனர். இதனையடுத்து 153 ரன்கள் எடுத்தால் வெற்றி என்ற இலக்குடன் களமிறங்கிய மேற்கிந்திய தீவுகள் அணி 18.5 ஓவரில் 8 விக்கெட் இழந்து 155 ரன்கள் எடுத்து வெற்றி பெற்றது. அதிகபட்சமாக நிகோலஸ் பூரன் 40 பந்துகளில் 67 ரன்கள் சேர்த்தார். இதன் மூலம் 5 போட்டிகள் கொண்ட தொடரில் மேற்கிந்திய தீவுகள் அணி 2-க்கு 0 என முன்னிலையில் உள்ளது.