ஹேமா கமிட்டி அறிக்கை குறித்து நடிகர் ரஜினிகாந்த் சொன்ன பதில்.. ஷாக்கான திரைத்துறை..

மலையாள திரையுலகை உலுக்கி வரும் ஹேமா கமிட்டி அறிக்கை குறித்த கேள்விக்கு 'எனக்கு தெரியாது' என நடிகர் ரஜினிகாந்த்  தெரிவித்துள்ளார். 

மலையாள திரையுலகில் நடிகைகள் மற்றும் பெண் கலைஞர்களுக்கு எதிரான பாலியல் துன்புறுத்தல்கள் நடைபெறுவதாக குற்றச்சாட்டு எழுந்தது. இதுகுறித்து விரிவான விசாரணை நடத்த  நீதிபதி ஹேமா தலைமையில் ஆணையம் அமைக்கப்பட்டது. இந்த ஹேமா கமிட்டியின் அறிக்கை, சில தினங்களுக்கு முன் வெளியாகி பரபரப்பை ஏற்படுத்தி வருகிறது. அதில், அதிகார மையத்தில் இருக்கும் நடிகர்கள், இயக்குநர்கள், தயாரிப்பாளர்களால்  நடிகைகள் உள்பட பெண் கலைஞர்கள் பாலியல் துன்புறுத்தலுக்கு ஆளானதாக தெரிவிக்கப்பட்டுள்ளது. 

ஹேமா கமிட்டி ரிப்போர்ட் வெளியான  பின்னர் பல நடிகைகள், தங்களுக்கும் பல்வேறு பாலியல் துன்புறுத்தல்கள் நடந்ததாக தற்போது கூறி வருகின்றனர்.   இதனையடுத்து  பாலியல் புகார்கள் குறித்து விசாரிக்க, சிறப்பு புலனாய்வு குழுவை கேரள அரசு அமைத்துள்ளது. அடுத்தடுத்து வரும் பாலியல் புகார்களால் மலையாள திரைப்பட நடிகர் சங்க( AMMA) தலைவர் மோகன்லால் உள்ளிட்ட அனைத்து நிர்வாகிகளும் கூண்டோடு ராஜினாமா செய்துள்ளனர். தொடர்ந்து நடிகர் மோகன்லால், நடிகர் மம்மூட்டி உள்ளிட்ட பலரும் இச்சம்பவம் குறித்து விளக்கமளித்து வருகின்றனர்.  

இதனைத்தொடர்ந்து  தமிழ் திரைத்துறையிலும் கமிட்டி அமைக்க வேண்டும் என கேள்வியெழுந்தது. அத்துடன் தெலுங்கு சினிமாவில் நிகழும் பாலியல் துன்புறுத்தல்கள் குறித்து விசாரிக்க குழு அமைக்க வேண்டும் என நடிகை சமந்தா கோரிக்கை விடுத்திருக்கிறார். ஒட்டுமொத்த இந்திய சினிமாவையும் உலுக்கியிருக்கும் இந்த சம்பவத்தால், திரையுலகைச் சேர்ந்த பலரும் பீதியுல் இருந்து வருகின்றனர். ஊடகங்கள் , நாளிதழ்கள் என எதிலும் ஹேமா கமிட்டி அறிக்கை தொடர்பான செய்திகள் அதிகம் வந்துகொண்டிருக்கின்றன.  

 இந்த நிலையில் மலையாள திரையுலகை உலுக்கியிருக்கும் இந்த சம்பவம் குறித்து சூப்பர் ஸ்டார் ரஜினிகாந்திடம் கருத்து கேட்கப்பட்டது. மலையாள சினிமாவை தொடர்ந்து தமிழ் சினிமாவிலும் ஹேமா கமிட்டி அமைக்க வலியுறுத்தப்படுகிறதே என செய்தியாளர்கள் எழுப்பிய கேள்விக்கு, ஹேமா கமிட்டி குறித்து ‘எனக்கு தெரியாது’என பதிலளித்தார்.  நடிகர் ரஜினிகாந்த்தின் இந்த பதில் திரைத்துறை வட்டாரத்தில் சலசலப்பை ஏற்படுத்தியுள்ளது.