பெரும் பான்மையுடன் வெற்றி பெற்று அதிமுக ஆட்சி அமைக்கும் என அதிமுக பொதுச்செயலாளர் எடப்பாடி பழனிச்சாமி கூறினார்.
கடலுார் வடக்கு மாவட்ட தொழில் நிறுவனங்களின் கூட்டமைப்பு, சிறு, குறு, நடுத்தர தொழில் முனைவோர், விவசாயிகள், வியாபாரிகள், பொதுநல சங்க உறுப்பினர்கள் கலந்தாய்வு கூட்டம் புதுச்சேரி பூர்ணாங்குப்பத்தில் உள்ள தனியார் மண்டபத்தில் நடந்தது. கூட்டத்தில் அதிமுக பொதுச்செயலாளர் எடப்பாடி பழனிசாமி பேசியதாவது, “தமிழகத்தில் அதிமுக ஆட்சியில் வறட்சி, புயல், கொரனா ஏற்பட்டது. அப்போது இருக்கும் நிதியில் சிறப்பாக மக்கள் நலத்திட்டங்களை நிறைவேற்றினோம். திமுக ஆட்சிக்கு வந்து 50 மாதமாகிறது. அவர்கள் எந்த இயற்கை இடர்பாடையும் சந்திக்கவில்லை. ஒரே ஒருமுறை மழை, வெள்ளம் வந்தது. தமிழக அரசுக்கு பெரிய பேரிடர் நெருக்கடி ஏற்படவில்லை. இந்த ஆட்சியில் வியாபாரிகள், சிறு, குறு, நடுத்தர தொழில் செய்வோர் பாதிக்கப்பட்டுள்ளனர். கடலுாரில் அதிமுக ஆட்சியில் பெரிய பஸ்ஸ்டாண்ட் அமைக்க இடம் தேர்வு செய்யப்பட்டது. ஆனால் திமுக ஆட்சியில் அதை அமைக்காமல் வேறு இடத்தை தேர்வு செய்தனர். வெயிலின் அருமை நிழலில்தான் தெரியும். இப்போது நீங்கள் படும் கஷ்டத்தை நாங்கள் அறிந்துள்ளோம். கடலுாரில் பிரதான தொழில் வேளாண்மை. வேளாண் தொழில் சிறப்பாக இருந்தால் மற்ற தொழில்களும் சிறப்பான வளர்ச்சி பெறும். அதிமுக குடும்ப கட்சி இல்லை, மக்களின் கட்சி, அதிமுக அரசு மக்களின் அரசு.
தமிழகத்தில் அதிமுக ஆட்சியில் சட்ட ஒழுங்கு சரியாக இருந்தது. 50 மாத திமுக ஆட்சியில் எங்கு பார்த்தாலும் போதை, மக்களுக்கு பாதுகாப்பு இல்லை. மாநிலம் வளர்ச்சி பெற சட்ட ஒழுங்கு சரியாக இருக்க வேண்டும். தமிழகத்தின் சட்ட ஒழுங்கு நாட்டின் வளர்ச்சிக்கு தடையாக உள்ளது. மிக மோசமான நிலைக்கு தமிழகம் தள்ளப்பட்டுள்ளது. நல்ல ஆட்சியை தர வேண்டும் என்பதே அதிமுகவின் எண்ணம். வரும் 2026 தேர்தலில் அனைவரும் அதிமுகவுக்கு ஆதரவு தர வேண்டும். திமுக மக்களுக்கான அரசு இல்லை, அவர்களுக்கான அரசு. அவர்களின் சுயலாபத்துக்காக ஒட்டுமொத்த மக்களின் நலனும் பாதிக்கப்படுகிறது.வேளாண்மைக்கு நீர் முக்கியம். அதை சரியான முறையில் பாதுகாத்து சேமித்து வேளாண் மக்களுக்கு வழங்க வேண்டும். அதிமுக ஆட்சியில் ஒரு சொட்டு நீர் கூட வீணாகக்கூடாது என குடி மராமத்து திட்டம் செயல்படுத்தினோம். பல தடுப்பணைகள் கட்ட திட்டமிட்டோம். ஆனால் ஆட்சி மாற்றத்தால் செய்ய முடியவில்லை. கோதாவரி- காவிரி இணைப்பை அமல்படுத்த பிரதமர் ஏற்று விரிவான திட்ட அறிக்கை தயாரிக்க மத்திய அரசு அறிவுறுத்தியது. ஆனால் திமுக எந்த ஒத்துழைப்பும் தரவில்லை. நடந்தாய்வாழி காவிரி திட்டம் பிரதமரிடம் கோரிக்கை வைத்தோம். அதையும் பிரதமர் ஏற்றுக் கொண்டார். ஜனாதிபதி உரையில் பிரதமர் அதை இடம்பெற செய்தார். இத்திட்டத்துக்கு ரூ.13 ஆயிரம் கோடி மத்திய அரசு தருகிறது. முதல்கட்டமாக ரூ.990 கோடி ஒதுக்கியுள்ளனர். நான் கொண்டுவந்த திட்டம் என்பதால், இத்திட்டத்தை பற்றி தமிழக திமுக அரசு பேசுவதில்லை. பிளாஸ்டிக் பயன்படுத்த அதிமுக ஆட்சியில் தடை கொண்டுவரப்பட்டது. ஆனால் மக்களிடம் ஒத்துழைப்பு கிடைக்கவில்லை. மக்கள் ஒத்துழைப்பு கிடைத்தால்தான் எந்த திட்டத்தையும் நிறைவேற்ற முடியும். 2026 தேர்தலில் அத்தனை அமைப்பை சேர்ந்தவர்களும் ஒருமித்த கருத்தோடு நல்ல அரசை அமைக்க துணை நிற்க வேண்டும்” என்றார்.
நிகழ்ச்சிக்குப் பிறகு அமித்ஷா கூட்டணி ஆட்சி தான் ஏற்படும் என்ற கூறிய கருத்து குறித்து செய்தியாளர்கள் கேள்வி கேட்டபோது பெரும் பான்மையுடன் வெற்றி பெற்று அதிமுக ஆட்சி அமைக்கும் என்று எடப்பாடி பழனிச்சாமி தெரிவித்தார்.