"அதிமுக கூட்டணியில் பாஜக தற்போது இல்லை" - ஜெயக்குமார் பரபரப்பு பேட்டி

அதிமுக கூட்டணியில் பாஜக தற்போது இல்லை என்று ஜெயக்குமார் தெரிவித்துள்ளார்.

இந்நிலையில் அதிமுக முன்னாள் அமைச்சர் ஜெயக்குமார்  இன்று செய்தியாளர்களை சந்தித்தார். அப்போது பேசிய அவர், "அதிமுக கூட்டணியில் தற்போது பாஜக இல்லை .கட்சி முடிவையே நான் சொல்கிறேன். தனித்து நின்றால் நோட்டாவை கூட தாண்ட முடியாதவர் அண்ணாமலை. கூட்டணி தர்மம் குறித்து பேசுவதை அதிமுக தொண்டர்கள் சகித்து கொள்ளமாட்டார்கள். பல முறை எச்சரித்தும் அலட்சியப்படுத்துகிறார் அண்ணாமலை. அண்ணாமலைக்கு தகுதிக்கு மீறிய பதவி கொடுக்கப்பட்டுள்ளது . தன்னை முன்னிலைப்படுத்தவே தொடர்ந்து தலைவர்களை அவமதிக்கிறார் என்றார்.

தொடர்ந்து பேசிய அவர், பாஜக கூடுதல் சுமை மட்டுமல்ல; தேவையற்ற சுமை. தந்தை பெரியார், பேரறிஞர் அண்ணாவை பற்றி பேசுவதற்கு அண்ணாமலைக்கு என்ன தகுதி இருக்கிறது? சிங்க கூட்டமான அதிமுகவை பார்த்து சிறு நரியான அண்ணாமலை ஊளையிடுவதா?அண்ணாமலைக்கு என்ன தகுதி இருக்கிறது?   என்று காட்டமாக விமர்சித்தார்.