ஆட்டோவுக்கு பயன்படுத்தும் கேஸில் சமையல்.. வெடித்துச் சிதறிய சிலிண்டர்.. பூவிருந்தமல்லியில் பரபரப்பு..

 By Ramya K Oct 12, 2024, 18:11 IST1728736878283
poonamallee Gas Cylinder Blast

சென்னை பூவிருந்தவல்லியில் வீட்டில் சமையல் கேஸ் சிலிண்டர் வெடித்த விபத்தில் 7 பேர் படுகாயம் அடைந்துள்ளனர். 

பூவிருந்தவல்லி அடுத்த சக்தி நகர் பகுதியில் குமார் என்பவருக்கு சொந்தமான வீட்டில்,  வட மாநில தொழிலாளர்கள் சிலர்  வாடகைக்கு தங்கி இருந்துள்ளனர்.இன்று மதியம் உணவு தயாரிப்பதற்காக வடமாநிலத் தொழிலாளர்கள்  வழக்கம் போல  சமையல் கேஸ் சிலிண்டரை ஆன் செய்துள்ளனர் அப்போது அதிலிருந்து எரிவாயு கசிவு ஏற்பட்டு தீ விபத்து ஏற்பட்டது. இதனை அடுத்து வீட்டிலிருந்த வடமாநில தொழிலாளர்கள் அங்கிருந்து அவசர அவசரமாக வீட்டைவிட்டு வெளியே ஓடிவந்தனர்.   அதேநேரம்  எதிர் வீட்டில் வசித்துவரும்  பிரஜன், குமார், சரஸ்வதி ஆகியோர் என்ன நடக்கிறந்து என்று பார்த்து கொண்டிருந்த போது திடீரென பயங்கர சத்தத்துடன்  சிலிண்டர் வெடித்து, வெளியில் வந்து விழுந்தது.  


இதில் அவர்கள் மீது தீ பரவிய நிலையில்  தீ காயமும் ஏற்பட்டது.  இதில் சிறுவர்கள் உள்பட 7 பேருக்கு தீக்காயம் ஏற்பட்டது. இதனை அடுத்து அங்கிருந்தவர்கள் தீக்காயமடைந்தவர்களை  மீட்டு கீழ்பாக்கம் அரசு மருத்துவமனைக்கு சிகிச்சைக்காக அனுப்பிவைத்தனர். தகவலறிந்து வந்த பூவிருந்தவல்லி தீயணைப்பு வீரர்கள் மற்றும் அப்பகுதி போலீசார் விரைந்து வந்து அங்கிருந்த பதட்டமான சூழலை சரிசெய்தனர்.  தொடர்ந்து விசாரணை மேற்கொண்டதில் வடமாநில தொழிலாளர்கள்,  வீட்டில்  காலி சிலிண்டர்களை வாங்கி வைத்து கொண்டு பெட்ரோல் பங்க்குகளில் ஆட்டோ மற்றும் வாகனங்களுக்கு நிரப்பி கூடிய கேஸை நிரப்பி சமையல் சிலிண்டராக உபயோகபடுத்தி வந்துள்ளது தெரியவந்தது.   

மேலும் அந்த சிலிண்டர்களில் ஏற்கனவே கசிவு ஏற்பட்ட நிலையில் அதனை கவனிக்காமல் இருந்ததால் இந்த தீ விபத்து ஏற்பட்டுள்ளதாக தெரிவிக்கப்பட்டுள்ளது.  இந்த தீ விபத்துக்கான காரணம் என்ன என்பது குறித்து பூவிருந்தவல்லி போலீசார் விசாரித்து வரும் நிலையில்,  சிலிண்டர் வெடித்து விபத்து நிகழ்ந்த வீட்டின் ஒரு பகுதி இடித்து விழுந்தது. சிலிண்டர் வெடித்து சிதறும் பதைபதைக்க வைக்கும் சிசிடிவி காட்சிகள் வெளியாகியுள்ளன.  இந்த சம்பவம் அப்பகுதியில் பெரும் அதிர்வலையை ஏற்படுத்தியுள்ளது. 
 

From around the web