இந்த போன் கால் உங்களுக்கும் வந்துச்சா? மோசடியாக இருக்கும்.. கண்டுபிடிப்பது எப்படி?

 மோசடி செய்பவர்கள் வங்கி அதிகாரிகள் அல்லது அரசாங்க பிரதிநிதிகள் என்று கூறிக் கொண்டு மக்களை அச்சுறுத்துகிறார்கள்.

இதுபோன்ற சூழ்நிலையில், நம்மிடம் பேசும் அந்த நபர் உண்மையில் வங்கியைச் சேர்ந்தவரா அல்லது மோசடி செய்பவரா என்பதைச் சரிபார்க்க நம்மிடம் சரியான வழிகள் இல்லை. இந்தப் பிரச்சினையைத் தீர்க்க மத்திய தொலைத்தொடர்புத் துறை மிகவும் பயனுள்ள டிஜிட்டல் அமைப்பைத் தொடங்கியுள்ளது. சஞ்சார் சாதி என்ற தளத்தில் உங்கள் உண்மையான அடையாளத்தை உறுதிப்படுத்த வேண்டும். தொலைத் தொடர்புத் துறை அதன் சஞ்சார் சாதி போர்ட்டலில் நிதி நிறுவன சரிபார்ப்பு அம்சத்தைச் சேர்த்துள்ளது. இந்த அமைப்பு ஒரு வங்கி அல்லது நிறுவனத்திலிருந்து மின்னஞ்சல், தொலைபேசி எண் அல்லது வலைத்தள இணைப்பு உண்மையானதா என்பதை நாம் சரிபார்க்க முடியும்.

அதற்கு, நீங்கள் செய்ய வேண்டியது சஞ்சார் சாதி நிதி சரிபார்ப்பு போர்ட்டலுக்குச் சென்று தேடல் பெட்டியில் சில தகவல்களை உள்ளிட வேண்டும். அதில் வங்கி அல்லது நிறுவனத்தின் பெயர், வலைத்தளம், மின்னஞ்சல் ஐடி, மொபைல் நம்பர் அல்லது கட்டணமில்லா எண் ஆகியவற்றை பதிவிடலாம். தகவல் சரியாக இருந்தால் அந்த போர்டல் வங்கியின் அதிகாரப்பூர்வ விவரங்களைக் காட்டும். அதில் நாம் பார்க்க நினைக்கும் வங்கி அல்லது நிறுவனத்தின் வலைத்தளம், மின்னஞ்சல் முகவரி, தொலைபேசி எண், வாட்ஸ்அப் தொடர்பு எண் மற்றும் வாடிக்கையாளர் சேவை எண் ஆகியவை அடங்கும்.

யாராவது உங்களை அழைத்து, ஸ்டேட் பாங்க் ஆஃப் இந்தியா வங்கியில் இருந்து பேசுவதாகவும், உங்கள் கணக்கை மீண்டும் சரிபார்க்க வேண்டும் என்றும் கூறினால், அது உண்மையில் ஒரு அதிகாரப்பூர்வ எண்ணா என்பதைச் சரிபார்க்க இந்த போர்ட்டலில் தொலைபேசி எண்ணை உள்ளிடலாம். பட்டியலில் அந்த எண் தோன்றவில்லை என்றால், அந்த அழைப்பு ஒரு மோசடி என்பது கிட்டத்தட்ட உறுதியாகிவிடும். அதேபோல நீங்கள் ஒரு மின்னஞ்சல் அல்லது வலைத்தள இணைப்பை சந்தேகத்திற்குரியதாக நினைத்தால் அதே பக்கத்தைப் பார்வையிடுவதன் மூலம் அந்த வெப்சைட்டின் நம்பகத்தன்மையைச் சரிபார்க்கலாம்.

https://www.sancharsaathi.gov.in/FinancialInstitutions/fiHome.jsp

மேலே உள்ள லிங்க்கை நீங்கள் கிளிக் செய்தால் அந்த வெப்சைட்டுக்கு நேரடியாகச் செல்லலாம்.
 

இந்த போர்ட்டலில் இன்னும் அனைத்தும் வசதிகளும் வரவில்லை. இன்னும் சில அம்சங்கள் சேர்க்கப்படவில்லை. ஐசிஐசிஐ வங்கி, ஆக்சிஸ் வங்கி மற்றும் ஹெச்டிஎஃப்சி வங்கி போன்ற பல முக்கிய தனியார் வங்கிகள் பற்றிய தகவல்கள் முழுமையடையவில்லை. வாட்ஸ் அப் எண்கள், வாடிக்கையாளர் பராமரிப்பு மின்னஞ்சல்கள் அல்லது ஹெல்ப்லைன் விவரங்கள் பல இடங்களில் கிடைக்கவில்லை.

மேலும், செபி மற்றும் இந்திய ரிசர்வ் வங்கி போன்ற முக்கிய ஒழுங்குமுறை அமைப்புகளிடமிருந்து தகவல்களைத் தேடும்போது எந்த முடிவும் கிடைக்கவில்லை. மத்திய அரசு இந்தத் தளத்தை மேலும் விரிவுபடுத்த வேண்டும். விரைவில் இந்த வெப்சைட்டில் அனைத்து அம்சங்களும் பயன்பாட்டுக்கு வரும் என்று கூறப்பட்டுள்ளது.

மோசடியான வங்கி அழைப்புகள் மற்றும் இணைப்புகளின் எண்ணிக்கை அதிகரித்து வருவதால், இந்த போர்டல் சாதாரண குடிமக்களுக்கு சைபர் பாதுகாப்பிற்கான ஒரு புதிய கருவியாக இருக்கும் என்று எதிர்பார்க்கப்படுகிறது. ஏதேனும் ஒரு அழைப்பு, மின்னஞ்சல் அல்லது வலைத்தளம் குறித்து உங்களுக்கு சற்று உறுதியாக தெரியவில்லை என்றால், இப்போது அதன் நம்பகத்தன்மையை இந்த வெப்சைட்டில் ஒரே கிளிக்கில் சரிபார்க்கலாம்.