சென்னையில் தங்கம் விலை 2வது நாளாக குறைந்திருக்கிறது. இன்றைய தினம் சவரனுக்கு ரூ.160 குறைந்து ஒரு கிராம் ரூ.6,660க்கு விற்பனை செய்யப்படுகிறது.
தங்கம் விலை அவ்வப்போது விலை உயர்வதும், குறைவதுமாக போக்கு காட்டிவந்தாலும், அடிப்படையில் கனிசமாக ஏற்றம் கண்டுள்ளதே நிதர்சனம். மத்திய பட்ஜெட்டில் தங்கம் மற்றும் வெள்ளியின் இறக்குமதி வரு 15 % லிருந்து 6% ஆக குறைக்கப்பட்டதை அடுத்து, தங்கம் விலை தடாலடியாக குறைந்துவிடும் என்று மக்கள் எதிர்பார்த்தனர். அதற்கேற்ப கடந்த மாதம் மட்டும் ரூ.5,000 வரை தங்கம் விலையும் குறைந்தது.
தொடர்ந்து குறையும் என எதிர்பார்த்த மக்களுக்கு ஏமாற்றமே மிச்சம் என்கிற வகையில், அடிக்கடி ஏற்றங்களை கண்டு வருகிறது. அவ்வப்போது சற்று இறக்கம் காட்டி வருகிறது. அந்தவகையில் கடந்த சனிக்கிழமை அதிரடியாக சவரனுக்கு 840 ரூபாயும், புதன்கிழமை சவரனுக்கு 400 ரூபாயும் அதிகரித்தது. அன்றைய தினம் ஒரு சவரன் ரூ.53,360க்கு விற்பனை செய்யப்பட்டது. இந்த நிலையில் நேற்று தங்கம் விலை சவரனுக்கு ரூ.240 குறைந்து, ஒரு சவரன் ரூ. 53,440க்கு விற்கப்பட்டது. தொடர்ந்து 2வது நாளாக இன்றும் தங்கம் விலை சற்று குறைந்திருக்கிறது.
அதன்படி சென்னையில் இன்று 2 2 கேரட் ஆபரணத் தங்கம் கிராமுக்கு 20 ரூபாய் குறைந்து ஒரு கிராம் ரூ.6,660 க்கு விற்பனை செய்யப்படுகிறது. அதேபோல் சவரனுக்கு 160 ரூபாய் குறைந்து ஒரு சவரன் 53,280 ரூபாய்க்கு விற்பனை செய்யப்படுகிறது. இதேபோல் சென்னையில் சில்லறை வர்த்தகத்தில் வெள்ளி விலை 30 காசுகள் குறைந்து ஒரு கிராம் 91 ரூபாய் 70 காசுகளுக்கு விற்பனை செய்யப்பட்டு வருகிறது.