தோல்விக்கு நானே பொறுப்பு... சூரியன் மீண்டும் உதிக்கும் - மாவட்டச் செயலாளர்கள் கூட்டத்தில் ஸ்டாலின் உருக்கம்..!

அண்ணா அறிவாலயத்தில் திமுக மாவட்ட செயலாளர்கள் கூட்டம் அக்கட்சியின் தலைவர் ஸ்டாலின் தலைமையில் இன்று நடைபெற்றது. கூட்டத்தில் ஸ்டாலின் பேசியதாவது: 

தேர்தலில் திமுக ஆட்சி அமைக்க தேவையான பெரும்பான்மையை பெற தவறிய போதிலும், 59 இடங்களில் வெற்றி பெற்றிருப்பது கடந்த கால தோல்விகளுடன் ஒப்பிடுகையில் (1991, 2011) கூடுதல் எண்ணிக்கையே என்று குறிப்பிட்டார். தற்போதைய வெற்றி-தோல்விக்கான வாக்கு சதவீத வேறுபாடு வெறும் 3.52% மட்டுமே என்றும், திமுகதான் மீண்டும் வெல்லும் என்ற நம்பிக்கையில் மக்கள் வாக்களிக்க தவறியது மற்றும் ஒருமித்த 'கவர்ச்சி மாயாஜால சுனாமி' போன்ற சூழல் நிலவியதே இந்த முடிவுக்குக் காரணம் என்றும் அவர் விளக்கினார். தமிழக அரசியல் நியதிப்படி 'சூரியன்' மீண்டும் உதித்தே தீரும் எனத் தொண்டர்களுக்கு நம்பிக்கை அளித்த அவர், கட்சியின் தலைவர் என்ற முறையில் இந்த தோல்விக்கு தானே முழு பொறுப்பேற்பதாக அறிவித்தார்.

தோல்விக்கான காரணங்களை ஆராய யாரையும் தனிப்பட்ட முறையில் குறை சொல்ல வேண்டாம் என்று கேட்டுக்கொண்ட ஸ்டாலின், கட்சி நிர்வாகிகள் மற்றும் பொதுமக்கள் தங்களது கருத்துக்களையும் ஆலோசனைகளையும் வெளிப்படையாக தெரிவிக்க ஏதுவாக தனி இணையதளம் (Website) நாளை தொடங்கப்படும் என்றார். மேலும், தொகுதி வாரியாக கள ஆய்வு நடத்தி அறிக்கை சமர்ப்பிக்க தலைமை சார்பில் ஒரு சிறப்பு குழு அமைக்கப்படும் என்றும், அந்த குழு அடுத்த 20 நாட்களுக்குள் தனது அறிக்கையை சமர்ப்பிக்கும் என்றும் தெரிவித்தார். இந்த ஆலோசனைகள் மற்றும் அறிக்கைகளின் அடிப்படையில் திமுகவின் அமைப்பு முறையில் மிகப்பெரிய மாற்றங்கள் கொண்டு வரப்படும் என அவர் உறுதியளித்தார்.

சமூக வலைதளங்களின் முக்கியத்துவத்தை வலியுறுத்திய ஸ்டாலின், தற்கால அரசியலில் மாநாடுகளை விட ஆன்லைன் தளம் பெரும் தாக்கத்தை ஏற்படுத்துவதை சுட்டிக்காட்டினார். கொரோனா காலத்தில் காணொலி வாயிலாக பொதுக்குழுவை நடத்தியது போல், இனி வரும் காலங்களில் நிர்வாகிகள் அனைவரும் சமூக வலைதளங்களில் நேரடியாக பங்கெடுத்து செயல்பட வேண்டும் என்று அறிவுறுத்தினார். குறிப்பாக, கட்சி பலவீனமாக உள்ள மற்றும் தோல்வியடைந்த தொகுதிகளில் நிலவும் நிர்வாகிகளின் கோஷ்டிப் பூசல்களைக் களைந்து, அனைவரும் ஒற்றுமையுடன் செயல்பட வேண்டியது வெற்றிக்கான அடிப்படை தேவை என்பதை அவர் அழுத்தமாக கூறினார்.

மாவட்ட செயலாளர்கள் மட்டுமே முக்கியம் என்ற நிலையை மாற்றி, அடிமட்டத் தொண்டர்கள் மற்றும் நிர்வாகிகள் வரை அனைவரையும் அரவணைத்து செல்ல வேண்டும் என்று வலியுறுத்திய அவர், செயல்பட இயலாதவர்கள் மனப்பூர்வமாக முன்வந்து பொறுப்பிலிருந்து விலகிக் கொள்ளலாம் என்றார். உழைக்க தகுதியானவர்கள் எத்தனையோ பேர் காத்து கொண்டிருப்பதாகவும், அடுத்த தேர்தலில் கட்டாயம் வெற்றி பெற்றாக வேண்டும் என்ற ஒற்றை இலக்குடன் களப்பணியாற்ற வேண்டும் என்றும் கேட்டு கொண்டார். இந்தத் தோல்வி தற்காலிகமானது என்றும், மீண்டும் வெற்றியை நோக்கிப் பயணிப்போம் என்றும் கூறி தனது உரையை நிறைவு செய்தார்.