விஜய்யுடன் காங்கிரஸ் கூட்டணி வைக்க வாய்ப்புள்ளதா?- ஜோதிமணி பேட்டி

விஜய் காங்கிரஸ் கட்சிக்கு புதியவர் அல்ல. சமூக வலைதளங்களில் வருவதை வைத்து கூட்டணியை முடிவு செய்ய இயலாது. நாங்கள் திமுக கூட்டணியில்தான் இருக்கிறோம் என்று காங்கிரஸ் எம்.பி ஜோதிமணி தெரிவித்துள்ளார்.

கரூர் ராமகிருஷ்ணபுரம் பகுதியில் உள்ள எம்பி அலுவலகத்தில் செய்தியாளர்களை சந்தித்த ஜோதிமணி, “12 மாநிலங்களில் புது விண்ணப்பம் கொடுத்து வாக்காளர் பட்டியல் திருத்தம் செய்கின்றனர். இது குடியுரிமை திட்டம். பாஜக ஆளும் அசாம் மாநிலத்தில் மட்டும் திருத்தம் செய்யாமல், குடிமக்கள் பதிவேடு திருத்தம் செய்கிறார்கள். குடியுரிமையை சரி பார்க்கும் பணி தேர்தல் ஆணையத்திற்கு இல்லை, உள்துறைக்கு சொந்தமானது.  இது தொடர்பான வழக்கு நீதிமன்றத்தில் இருக்கும் போது, SIR வழக்கும் நீதிமன்றத்தில் நிலுவையில் இருக்கும் போது, பாஜக ஆளாத தமிழ்நாடு, கேரளாவில் செயல்படுத்துவதன் நோக்கம் என்ன? 30 நாளில் குடியுரிமை திருத்தம் செய்ய முடியுமா? வாக்காளர் திருத்தமாக இருந்தால் இன்று முடிந்திருக்கும். 95% முடித்து விட்டதாக சொல்கிறீர்கள். ஆனால், அது உண்மை இல்லை, பல குளறுபடி இருக்கிறது. 

தேர்தல் ஆணையத்திற்கும், பாஜகவிற்கும் நம்மை பார்த்தால் ஏமாளி போல் தெரிகிறதா? பாஜக ஆளும் மாநிலங்களில் ஒரு நிலைப்பாடும், பாஜக ஆளாத மாநிலங்களில் ஒரு நிலைப்பாட்டுடன் தேர்தல் ஆணையம் செயல்படுகிறது. விஜய் காங்கிரஸ் கட்சிக்கு புதியவர் அல்ல. விஜய் கடந்த 2010-ல் ராகுல் காந்தியை சந்தித்து காங்கிரஸில் இணைய வந்தவர், அன்று சில காரணங்களால் அது நடக்கவில்லை. அவர் எங்களுக்கு தெரியாத நபரும் அல்ல..கரூர் துயர சம்பத்தில் காங்கிரஸ் தலைவர்கள் அனைவரும் பேசியது போல், அவரும் பேசினார். சமூக வலைதளங்களில் வருவதை வைத்து கூட்டணிகளை முடிவு செய்ய இயலாது. நாங்கள் இப்போதும் திமுகவுடன் கூட்டணியில் இருக்கிறோம். அதனால் கூட்டணி குறித்து பேச இன்னும் காலம் இருக்கிறது” என்று கூறினார்.