புதிதாக கட்சி தொடங்குபவர்கள் எல்லாம் திமுக அழிய வேண்டுமென கூறுகிறார்கள் என கொளத்தூர் விழாவில் முதலமைச்சர் மு.க.ஸ்டாலின் பேசியுள்ளார்.
சென்னை கொளத்தூர் தொகுதியில் ₹2.85 கோடி மதிப்பீட்டில் கட்டப்பட்ட முதல்வர் படைப்பகத்தை தமிழ்நாடு முதலமைச்சர் மு.க.ஸ்டாலின் திறந்து வைத்தார். படிப்பு தளம், பணியாற்றும் தளம் மற்றும் உணவுத்தளம் உள்ளிட்ட உட்கட்டமைப்பு வசதிகளை உள்ளடக்கியுள்ளது இந்த படிப்பகம். இதனை தொடர்ந்து விழாவில் பேசிய முதலமைச்சர் மு.க.ஸ்டாலின், நீட் தேர்வுக்கு எதிரான தமிழ்நாட்டு மக்களின் ஒருமித்த குரலுக்கு ஒரு நாள் ஒன்றிய அரசு பணியத்தான் போகிறது. இன்றைக்கு இல்லாவிட்டாலும் நாளை அல்லது நாளை மறு நாள் நடந்துதான் தீரும் என கூறினார்.
இதனை தொடர்ந்து பேசிய அவர், புதிதாக கட்சி தொடங்குபவர்கள் எல்லாம் திமுக அழிய வேண்டுமெனகூறுகிறார்கள். திமுக ஆட்சியின் 4 ஆண்டு சாதனைகளை அவர்கள் ஒரு கணம் எண்ணிப் பார்க்க வேண்டும். தேவையில்லாமல் எல்லோருக்கும் பதில் சொல்ல வேண்டிய அவசியமில்லை. அது தேவையும் இல்லை. எங்கள் நேரத்தை வீணடிக்க நாங்கள் விரும்பவில்லை என கூறினார். முதலமைச்சர் மு.க.ஸ்டாலினின் இந்த பேச்சு தவெக தலைவர் விஜயை மறைமுகமாக தாக்கும் வகையில் அமைந்துள்ளது.