அரசுப் பள்ளிகளில் பணியாற்றும் பகுதி நேர ஆசிரியர்களை பணி நிரந்தரம் செய்க- ஓபிஎஸ்

அரசுப் பள்ளிகளில் பணியாற்றும் பகுதி நேர ஆசிரியர்களை பணி நிரந்தரம் செய்யுமாறு முன்னாள் முதலமைச்சர் ஓ.பன்னீர்செல்வம் வலியுறுத்தியுள்ளார்.

இதுதொடர்பாக ஓ.பன்னீர்செல்வம் வெளியிட்டுள்ள அறிக்கையில், “இடைநிலை ஆசிரியர்களுக்கு சம வேலைக்கு சம ஊதியம், மருத்துவர்களுக்கு ஊதிய உயர்வு மற்றும் பதவி உயர்வு, பழைய ஒய்வூதியத் திட்டம், அனைத்துக் காலிப் பணியிடங்களை நிரப்புதல், பகுதி நேர ஆசிரியர்கள் பணி நிரந்தரம் போன்ற பல்வேறு வாக்குறுதிகளை அளித்த தி.மு.க., ஆட்சிக்கு வந்து மூன்று ஆண்டுகள் கடந்தும் எதையும் நிறைவேற்றாமல் இருப்பதைப் பார்க்கும்போது, வாக்குறுதிகளை நிறைவேற்ற வேண்டுமென்ற எண்ணம் தி.மு.க. அரசுக்கு துளிகூட இல்லை என்பது தெளிவாகிவிட்டது. தி.மு.க.வை நம்பி வாக்களிப்பது என்பது மண் குதிரை நம்பி ஆற்றில் இறங்குவதற்குச் சமம் என்ற நிலைக்கு தமிழ்நாட்டு மக்கள் வந்துவிட்டார்கள்.

தமிழ்நாட்டில் உள்ள அரசுப் பள்ளிகளில் 15,000-க்கும் மேற்பட்ட பகுதி நேர ஆசிரியர்கள் 2012 ஆம் ஆண்டு முதல் பணியாற்றி வருகிறார்கள். இவர்களுக்கு மாதம் 12,500 ரூபாய் தொகுப்பூதியம் மட்டுமே வழங்கப்படுகிறது. சொத்து வரி உயர்வு, மின் கட்டண உயர்வு, விலைவாசி உயர்வு என பல்வேறு இன்னல்கள் அவர்களை தொடர்ந்து தாக்கிக் கொண்டிருக்கின்ற நிலையில், இந்த சொற்ப ஊதியத்தை வைத்துக் கொண்டு குடும்பத்தை நடத்துவது அவர்களுக்கு மிகவும் சிரமமாக இருக்கிறது. பன்னிரெண்டு ஆண்டுகளுக்கும் மேலாக தொகுப்பூதியத்தில் பணியாற்றிக் கொண்டு வருபவர்களை நிரந்தரம் செய்வது என்பது மிகவும் நியாயமான கோரிக்கை என்பதில் யாருக்கும் எவ்வித மாறுபட்ட கருத்தும் இருக்க முடியாது.

தி.மு.க. தனது தேர்தல் வாக்குறுதி எண் 181-ல் “பள்ளிக் கல்வித் துறையில் தற்போது பகுதி நேர ஆசிரியர்களாக பணியாற்றி வரும் ஓவிய ஆசிரியர்கள், இசை ஆசிரியர்கள், உடற்பயிற்சி ஆசிரியர்கள் ஆகியோரை பணி நிரந்தரம் செய்ய நடவடிக்கை மேற்கொள்ளப்படும்” என அறிவித்திருந்தது. 2016 ஆம் ஆண்டிலும் இதேபோன்றதொரு வாக்குறுதியை அளித்து இருந்தது. ஆனால், ஆட்சிக்கு வந்து மூன்று ஆண்டுகள் கழிந்தும் இதனை நிறைவேற்ற தி.மு.க. அரசு நடவடிக்கை எடுக்கவில்லை. இதனைக் கண்டித்து, பகுதி நேர ஆசிரியர் சங்கங்களின் ஒருங்கிணைப்புக் குழு சார்பில் ஆசிரியர்கள் குடும்பத்துடன் உண்ணாவிரதப் போராட்டத்தில் ஈடுபட்டனர். போராட்டத்தில் ஈடுபட்டவர்களுடன் பேச்சுவார்த்தை நடத்தப்பட்டு, கோரிக்கைகள் நிறைவேற்றப்படும் என அரசு சார்பில் உறுதி அளிக்கப்பட்ட நிலையில், போராட்டத்தை பகுதி நேர ஆசிரியர்கள் தற்காலிகமாக முடித்துக் கொண்டனர்.

இருப்பினும், அரசு மருத்துவர்கள், இடைநிலை ஆசிரியர்கள் போராட்டங்களை மேற்கொண்டபோது இதேபோன்று உறுதிமொழிகள் அளிக்கப்பட்டு, அவை நிறைவேற்றப்படாத சூழ்நிலையில், தற்போது போராட்டத்தை முடிவுக்கு கொண்டு வர வேண்டும் என்பதற்காக ஓர் உறுதிமொழி அரசு சார்பில் அளிக்கப்பட்டதோ என்ற சந்தேகமும் பகுதி நேர ஆசிரியர்கள் மத்தியில் நிலவுகிறது. அதாவது, தி.மு.க. அரசின் மீதான நம்பிக்கையை அவர்கள் இழந்துவிட்டார்கள். பகுதி நேர ஆசிரியர்களின் ஐயத்தை போக்கும் வகையில், அவர்களை பணி நிரந்தரம் செய்யவும், இதேபோன்று இடை நிலை ஆசிரியர்கள் மற்றும் அரசு மருத்துவர்களுக்கு அளித்த வாக்குறுதியினை நிறைவேற்றவும் தி.மு.க. அரசு உடனடி நடவடிக்கை எடுக்க வேண்டுமென்று அண்ணா திராவிட முன்னேற்றக் கழக தொண்டர்கள் உரிமை மீட்புக் குழுவின் சார்பில் வலியுறுத்திக் கேட்டுக் கொள்கிறேன்” எனக் குறிப்பிட்டுள்ளார்.