லாரி மீது கார் மோதி பயங்கர விபத்து- திருமண நாளில் உயிரிழந்த வாலிபர்

விழுப்புரம் நாகப்பட்டினம் நான்கு வழிச்சாலையில் நெடுஞ்சாலைத்துறை அலட்சியத்தால் அடுத்தடுத்து மூன்று வாகனங்கள் மோதி கவிழ்ந்து விபத்துக்குள்ளானதில் திருமண நாளில் வாலிபர் ஒருவர் உயிரிழந்தார்.

சென்னை கே.கே.நகரை சேர்ந்தவர் தாமஸ் (45) இவரது மனைவி ஜெசிந்தா ராணி (40) இவர்கள் இருவருக்கும் திருமணநாள் என்பதால் காரில் வேளாங்கண்ணி ஆலயத்துக்கு சென்றனர். பின்னர் அங்கிருந்து மீண்டும் அவர்கள் சென்னைக்கு புறப்பட்டனர். இன்று இரவு கடலூர் அருகே நாகப்பட்டினம்- விழுப்புரம் நான்கு வழிச்சாலையில் காரைக்காடு பகுதியில் வந்தபோது முன்னே சென்ற வேனை அவர்கள் முந்தி செல்ல முயன்றனர் அப்போது எதிர்பாராதவிதமாக அவர்கள் சென்ற கார் எதிரே கடலூரில் இருந்து ஜல்லி கற்களை ஏற்றிக்கொண்டு வந்த லாரி மீது பயங்கரமாக மோதியது. மேலும் அந்த கார் முன்னே சென்ற வேன் மீதும் மோதியதில் வேன் கவிழ்ந்தது. இந்த விபத்தில் 3 வாகனங்களும் பலத்த சேதமடைந்தன. காரில் வந்த தாமஸ், ஜெசிந்தாராணி மற்றும் வேனில் வந்த ஒரு பெண் உள்பட 11 பேர் படுகாயம் அடைந்தனர். 

இது குறித்த தகவலின் பேரில் கடலூர் முதுநகர் போலீசார் சம்பவ இடத்துக்கு விரைந்து சென்று விபத்தில் காயமடைந்தவர்களை மீட்டு சிகிச்சைக்காக கடலூர் அரசு மருத்துவமனைக்கு அனுப்பி வைத்தனர். அங்கு சிகிச்சை பலனின்றி தாமஸ் பரிதாபமாக இறந்தார். 10 பேருக்கு தீவிர சிகிச்சை அளிக்கப்பட்டு வருகிறது. இது குறித்த புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர். விழுப்புரம் முதல் நாகப்பட்டினம் வரை அமைக்கப்பட்டுள்ள நான்கு வழிச்சாலையில் இரண்டு இடங்களில் தற்போது டோல் வசூலிக்கப்பட்டு வருகிறது. ஆனால் பல்வேறு இடங்களிலும் இந்தச் சாலைகள் ஒருவழிச் சாலையாக மாற்றப்பட்டு வாகனங்கள் அனுப்பப்பட்டு வருகின்றன. இப்படி கடலூர் அருகே ராமாபுரம் முதல் சங்கொலிகுப்பம் வரை சாலை பணி காரணமாக நான்கு வழிச்சாலை ஒரு வழி பாதையாக மாற்றப்பட்டு வாகனங்கள் சென்று வருகின்றன. ஆனால் எதிர் திசையில் வாகனம் வரும் என்பது தொடர்பான அறிவிப்பு பலகை அங்கு வைக்கப்படவில்லை. இதனால் தான் இந்த விபத்து நடந்துள்ளது. எனவே இந்த விபத்துக்கு அதிகாரிகளின் அலட்சியமே காரணம் என அப்பகுதி மக்கள் குற்றம்சாட்டினர். இந்த சங்கிலித்தொடர் விபத்தில் தனது திருமண நாளில் வாலிபர் இறந்த சம்பவம் அப்பகுதி மக்களிடையே பெரும் சோகத்தை ஏற்படுத்தி உள்ளது.