உதயநிதி ஸ்டாலின் பிறந்தநாள் ஸ்பெஷல்- “இளம் தலைவர் வருகிறார்” பாடல் வெளியீடு

சென்னை தேனாம்பேட்டை அண்ணா அறிவாலயத்தில் உள்ள கலைஞர் அரங்கில் தமிழ்நாடு துணை முதலமைச்சரும் திமுக இளைஞரணி செயலாளருமான உதயநிதி ஸ்டாலின் பிறந்த நாளை ஒட்டி திமுக இளைஞரணி மாநில துணை செயலாளர் எஸ்.ஜோயல் பாடல் வரிகளில் "வரலாறு படைக்க இளம் தலைவர் வருகிறார்" என்ற பாடல் வெளியீட்டு விழா நடைபெற்றது. இப்பாடலை பள்ளிக் கல்வித் துறை அமைச்சரும் திருச்சி தெற்கு மாவட்ட செயலாளருமான அன்பில் மகேஷ் பொய்யா மொழி வெளியிட மாநில இளைஞரணி துணை செயலாளர்கள் பெற்றுக்கொண்டனர். இசையமைப்பாளர் பி.மாரி சக்தி இசையமைத்து, திரைப்படப் பாடகர் மனோ இந்தப் பாடலை பாடியுள்ளார்.

நிகழ்ச்சியில் பேசிய அமைச்சர் அன்பில் மகேஷ் பொய்யாமொழி, “வருங்காலத்தை தமிழ்நாட்டை வழிநடத்தக்கூடிய துணை முதல்வரின் பிறந்தநாள் கோலாகலமாக கொண்டாடப்பட்டு வருகிறது. இளைய சமுதாயத்தினர் தங்களது தனித்திறமையை வளர்த்துக் கொள்ள வேண்டும், அறிவு சார்ந்த கருத்துக்களை இளைய சமுதாயத்தினர் உள்வாங்கிக் கொள்ள வேண்டும். ஜல்லிக்கட்டு காளை ஆக இருக்கப் போகிறோமா இல்லை மழையில் முளைத்த காளானாக இருக்கப் போகிறோமா என்பது நம் கையில் தான் உள்ளது. பாசிச சக்திகளை வீழ்த்தி வேறு அறுப்போம் என்ன கம்பீரமான வார்த்தைகள் பாடல்களில்  பயன்படுத்தப்பட்டுள்ளது.

தமிழ்நாடு முழுவதும் சுற்றுப்பயணம் மேற்கொண்டு கழகத்திற்கான வெற்றியை பெற்றுக் கொடுத்தவர் நம்முடைய கழக இளைஞரணி செயலாளர் உதயநிதி ஸ்டாலின்.  இளைய சமுதாயத்தை அழைத்துக் கொண்டு ஒரு இடத்தில் அமர வைக்க பாடுபட்டுக் கொண்டிருக்கிறார் நம்முடைய இளைஞர் அணி செயலாளர். Ak 47 என்ற பவர்ஃபுல் மெஷின்கன்கள் உள்ளது. ஆனால் நமது இயக்கத்தில் எம்கே 24 என்ற ஆயுதம் உள்ளது. அதற்கு அடுத்து எம் கே எஸ் 53 என்ற ஆயுதம் உள்ளது, தற்பொழுது புதிதாக MKUS77 என்ற புதிய வெப்பன் வந்துள்ளது. இது தாக்கக்கூடியது, அளிக்கக்கூடியது மட்டும் அல்ல, கருத்துக்களை கொண்டு தாக்கப்போகிறோம் எந்த மேடையில் எந்த கருத்தை பேச வேண்டும் என்ற அறிவை சார்ந்த இயக்கமாக நமது இயக்கம் உள்ளது” என்றார்.