புதுச்சேரி மாநில பாஜக தலைவராக முன்னாள் நியமன எம்.எல்.ஏ., வி.பி.ராமலிங்கம் தேர்வு செய்யப்பட்டுள்ளார்.
புதுச்சேரியில் புதிய தலைவர் தேர்தலுக்கான அறிவிப்பு வெளியான நிலையில் , பாஜக நிர்வாகிகள் கூட்டம் நேற்று நடைபெற்றது. இதில் முன்னாள் நியமன எம்.எல்.ஏ., வி.பி.ராமலிங்கத்தை தலைவராக தேர்வு செய்ய அதிகளவிலான நிர்வாகிகள் ஆதரவளித்ததாக கூறப்படுகிறது. இதுகுறித்து கட்சி மேலிடத்திற்கும் தெரிவிக்கப்படதை அடுத்து, புதுச்சேரி பாஜக தலைவர் பதவிக்கு வேட்புமனு தாக்கலில், முன்னாள் நியமன எம்எல்ஏ ராமலிங்கம் இன்று(ஜூன் 29) வேட்பு மனு தாக்கல் செய்தார். அவரை தவிர வேறு யாரும் மனு தாக்கல் செய்யாததால் புதுச்சேரி மாநில பாஜக தலைவராக நாளை அவர் முறைப்படி அறிவிக்கப்படுகிறார்.
வி.பி.ராமலிங்கம், 1962 ஆண்டு மார்ச் மாதம் 22ம் தேதி பிறந்தார். புதுச்சேரி காங்கிரஸ் ஆட்சியில் சபாநாயகராக இருந்த வி.பி.சிவகொழுந்துவின் சகோதரரான இவர் 2019-ல் இருந்து காங்கிரஸ் கட்சியில் இருந்து பாஜகவில் இணைந்தார். அதன் பிறகு நடைபெற்ற சட்டமன்றத் தேர்தலில் பாஜகவின் வெற்றிக்காக பணியாற்றிய இவர் 2021-ம் ஆண்டு மே 11-ம் தேதி நியமன சட்டமன்ற உறுப்பினாக தேர்வு செய்யப்பட்டார்.
அதன் பிறகு கடந்த 4 ஆண்டுகளுக்கு மேலாக சட்டமன்ற உறுப்பினராக பணியாற்றி வரும் ராமலிங்கம், கடந்த 27-ம் தேதி தனது பதவியை ராஜினாமா செய்தார். இந்த நிலையில் பாஜக புதிய தலைவராக ஒரு மனதாக தேர்வு செய்யப்படுகிறார். நாளை இதுகுறித்து முறைப்படி அறிவிப்பு வெளியாகும் என எதிர்பார்க்கப்படுகிறது.