சௌகார் ஜானகி (Sowcar Janaki) என்பவர் தமிழ், தெலுங்கு, கன்னடம் மற்றும் மலையாளத் திரைப்படங்களில் நடித்துப் புகழ்பெற்ற திரையுலகின் பழம்பெரும் முன்னணி நடிகை ஆவார். ஏழு தசாப்தங்களுக்கும் (70 ஆண்டுகள்) மேலான நீண்ட கலைப்பயணத்தில் கிட்டத்தட்ட 400 திரைப்படங்களில் நடித்துள்ள இவர், இந்திய அரசின் உயரிய பத்மஸ்ரீ விருது (2022) பெற்றவர் ஆவார்.
திரைப்பயணம்
- 1950ஆம் ஆண்டு என்.டி.ராமாராவ் நடித்த தெலுங்கு திரைப்படமான 'சவுகாரு' மூலம் கதாநாயகியாக திரையுலகில் அறிமுகமானதால், ‘சௌகார் ஜானகி’ என அழைக்கப்பட்டார்.
- தமிழ், தெலுங்கு, கன்னடம் உள்பட பல்வேறு மொழிகளில் 400க்கும் மேற்பட்ட படங்களில் நடித்துள்ளார்.
- இரு கோடுகள், உயர்ந்த மனிதன், பாமா விஜயம், எதிர்நீச்சல் உள்ளிட்ட பல தமிழ் படங்களில் நடித்துள்ளார்.
- எம்.ஜி.ஆர்., சிவாஜி, ஜெமினி கணேசன் போன்ற முன்னணி நடிகர்களுடன் நடித்தவர்.
- சினிமாவுக்கு வருவதற்கு முன்னதாக சுமார் 300-க்கும் மேற்பட்ட நாடகங்களில் நடித்துள்ளார் சௌகார் ஜானகி.
- கடந்த 2020ஆம் ஆண்டு சந்தானம் நடிப்பில் வெளியான ‘பிஸ்கோத்’ படம்தான் சௌகார் ஜானகி நடித்த கடைசி (400ஆவது) திரைப்படம்.
- ஆந்திராவின் மறைந்த முதலமைச்சர் என்.டி.ராமாராவ், மறைந்த தமிழ்நாடு முதலமைச்சர்கள் MGR, கலைஞர் கருணாநிதி, ஜெயலலிதா ஆகிய 4 முதலமைச்சர்களுடன் நடித்த பெருமைக்குரியவர் சௌகார் ஜானகி.
- நாடகம் மற்றும் சினிமாவில் அவரது கலைச் சேவையை பாராட்டி இந்திய அரசு கடந்த 2022இல் அவருக்கு பத்மஸ்ரீ விருது வழங்கி கௌரவித்தது.