"இளைஞர்கள் கட்டாயம் ஹெல்மெட் அணிந்து இருசக்கர வாகனத்தில் செல்ல வேண்டும்" - முதல்வர் ஸ்டாலின் அறிவுறுத்தல்!!

சாலை விபத்தில் சிக்கியவர்களுக்கு முதல் 48 மணி நேரத்திற்கான மருத்துவ சிகிச்சை செலவை அரசே ஏற்கும் இன்னுயிர் காப்போம் திட்டம் 610 மருத்துவமனைகளில் இன்று தமிழக முதலமைச்சர் மு.க.ஸ்டாலினால் தொடங்கி வைக்கப்பட்டது. விபத்தில் சிக்கியவர்கள் எந்த நாடு எந்த மாநிலத்தைச் சேர்ந்தவராக இருந்தாலும் சிகிச்சைக்கான செலவை அரசே ஏற்கும் என்பதே இத்திட்டத்தின் சிறப்பம்சமாக உள்ளது.

இந்நிலையில் நிகழ்ச்சியை தொடங்கி வைத்து பேசிய முதல்வர் ஸ்டாலின், "விபத்துகளை பொறுத்தவரை இந்திய அளவில் அதிக உயிரிழப்பு ஏற்படும் மாநிலமாக தமிழ்நாடு உள்ளது வருத்தத்தை தருகிறது.  நாட்டுக்கே பெருமை சேர்க்கும் வகையில் தமிழ்நாடு சிறப்பாக செயல்பட்டு வருகிறது. இந்தியாவில் உள்ள முதல்வர்களில் நான் முதலிடம் என்பதைவிட தமிழகம்தான் மற்ற மாநிலங்களைவிட முன்னணியாக இருக்க வேண்டும் என்பதே எனது எண்ணம். சாலை விதிகளை கடைப்பிடிப்பதில் தான் சமூக பண்பாடு தனிமனித ஒழுக்கம் இருக்கிறது. தனிநபரின் உயர் நாட்டுக்கு மிக முக்கியம். சாலை பாதுகாப்பை மேம்படுத்த தமிழக அரசு சிறப்பு கவனம் செலுத்தி வருகிறது.

தனிநபரின் உயிர் நாட்டுக்கு மிக முக்கியம் என்பதை நாம் உணர வேண்டும். சாலை விபத்துகளில் உயிரிழப்புகளை தடுக்கும் வகையில் இன்னுயிர் காப்போம் திட்டம் தொடங்கப்பட்டுள்ளது.  விபத்துக்கு முக்கிய காரணம் சாலைகளில் வேகமாக செல்வது, எனவே சாலை விதிகளை கட்டாயம் கடைபிடிக்க வேண்டும். இளைஞர்கள் கட்டாயம் ஹெல்மெட் அணிந்து இருசக்கர வாகனத்தில் செல்ல வேண்டும்; கார்களில் பயணம் செய்யும்போது சீட் பெல்ட் அணிய வேண்டும்" என்று கேட்டுக்கொண்டுள்ளார்.