• July
    19
    Friday

Main Area

Main



மல்லையா போன்று நிரவ் மோடியை நாடு கடத்துவதில் தாமதம் இருக்காது; விசாரணை அமைப்புகள்!

கோப்புப்படம்
கோப்புப்படம்
Loading...

புதுதில்லி: விஜய் மல்லையா போன்று நிரவ் மோடியை நாடு கடத்துவதில் தாமதம் ஏற்படாது என விசாரணை அமைப்புகள் நம்பிக்கை தெரிவித்துள்ளன.

இந்திய வங்கிகள் பலவற்றிலும் ரூ.9 ஆயிரம் கோடிக்கும் மேல் கடன் வாங்கி திருப்பிச் செலுத்தாத வழக்கில் தேடப்பட்டு வரும் குற்றவாளியாக அறிவிக்கப்பட்டுள்ள விஜய் மல்லையா, கடந்த 2016-ஆம் ஆண்டு மார்ச் மாதம் முதல் லண்டனில் வசித்து வருகிறார்.

அவரை இந்தியா கொண்டு வரும் முயற்சியில் மத்திய அரசு தீவிரமாக செயல்பட்டு வந்த நிலையில், விஜய் மல்லையாவை இந்தியாவுக்கு நாடு கடத்த இங்கிலாந்து உள்துறை அமைச்சகம் அனுமதி வழங்கியது.ஆனால், அதனை எதிர்த்து அவர் மேல்முறையீடு செய்துள்ளதால் அவரை நாடு கடத்துவதில் இழுபறி நீடித்து வருகிறது.

vijay mallya

அதேபோல், ரூ.11 ஆயிரத்து 600 கோடிக்கும் அதிகமாக சட்டவிரோத பரிவர்த்தனையும், ரூ.280 கோடி மோசடி செய்ததாகவும் குஜராத்தை சேர்ந்த வைர நகை வியாபாரி நிரவ் மோடி மீது பஞ்சாப் நேஷனல் வங்கி புகார் அளித்தது. ஆனால், அவரும் நாட்டை விட்டு கடந்த ஆண்டே வெளியேறி விட்டார். இது தொடர்பாக சிபிஐ மற்றும் அமலாக்கத்துறை போலீசார் வழக்குப்பதிவு செய்து விசாரணை மேற்கொண்டு வருகின்றனர். 

நிரவ் மோடி பல்வேறு நாடுகளுக்கு பறந்து கொண்டிருக்கிறார் என தகவல்கள் வெளியான நிலையில், அவர் லண்டனில் வசிப்பதாக பிரிட்டிஷ் செய்தி நிறுவனமான 'தி டெலிகிராப்' செய்தி வெளியிட்டது.

niravmodi

இதையடுத்து, நிரவ் மோடியை நாடு கடத்த இங்கிலாந்து அரசிடம் கோரிக்கை வைத்தது. இந்த மனுவில் சமீபத்தில் அந்நாட்டு உள்துறை அமைச்சகம் கையெழுத்திட்டு, லண்டன் வெஸ்ட்மின்ஸ்டர் நீதிமன்றத்திற்கு அனுப்பியது. இவ்வழக்கை விசாரணைக்கு ஏற்ற நீதிமன்றம், நிரவ் மோடியை கைது செய்ய வாரண்ட் பிறப்பித்தது. தொடர்ந்து நிரவ் மோடி லண்டனில் நேற்று கைது செய்யப்பட்டார். அவரது ஜாமின் மனுவை ஏற்க மறுத்த நீதிமன்றம், நிரவ் மோடியை வருகிற 29-ம் தேதி வரை காவலில் வைக்க உத்தரவிட்டு அன்றைய தினத்துக்கு வழக்கு விசாரணையை ஒத்தி வைத்துள்ளது.

இந்நிலையில், விஜய் மல்லையாவை நாடு கடத்தற்கு செய்யப்பட்ட முயற்சிகள் மூலம் ஐரோப்பிய நாடுகளில் இருந்து ஒருவரை நாடு கடத்துவதற்கான செயல்முறைகளை நன்கு தெரிந்து கொள்ள முடிந்தது. நிரவ் மோடியை இந்தியா கொண்டு வருவது தொடர்பான ஆவணங்கள் அனைத்தும் இங்கிலாந்து அதிகாரிகளிடம் வழங்கப்பட்டு, ஓட்டைகள் அனைத்தும் அடைக்கப்பட்டு விட்டதால், விஜய் மல்லையா போன்று நிரவ் மோடியை நாடு கடத்துவதில் தாமதம் ஏற்படாது என விசாரணை அமைப்புகள் நம்பிக்கை தெரிவித்துள்ளன.

இதுகுறித்து அவர்கள் கூறுகையில், சிபிஐ மற்றும் அமலாக்கத்துறை அதிகாரிகள் அளித்த ஆதாரங்கள் அனைத்தும் இங்கிலாந்து நீதிமன்றத்தில் அளிக்கப்பட்டதால் தான் நிரவ் மோடிக்கு ஜாமின் மறுக்கப்பட்டது என்று தெரிவித்துள்ளனர்.

இதனிடையே, நிரவ் மோடியின் வழக்கு மும்பை நீதிமன்றத்தில் நாளை விசாரணைக்கு வரவுள்ளது. பிரிட்டனில் நடக்கும் வழக்கு விசாரணையின் முன்னேற்றங்கள், அவரை தப்பியோடிய பொருளாதார குற்றவாளி என முத்திரை குத்த உதவும் எனவும் விசாரணை அதிகாரிகள் நம்பிக்கை தெரிவித்துள்ளனர்.

அதேசமயம், நிரவ் மோடியின் வழக்கு விசாரணை லண்டன் நீதிமன்றத்தில் வரும் போது, சிபிஐ மற்றும் அமலாக்கத்துறை அதிகாரிகள் ஆஜராவார்களா என்பது குறித்து இதுவரை முடிவெடுக்கப்படவில்லை. ஏனெனில் வழக்கு விசாரணைக்கு உதவி தேவை என்ற கோரிக்கை அவர்களுக்கு இதுவரை வரவில்லை எனவும் தெரிவிக்கப்பட்டுள்ளது.

2018 TopTamilNews. All rights reserved.